@بثي يا اذاعه وانشري ياجريده @

منول الشاعـر بمنطـق ومنطـوق
يمشي على مذهـب وراي وعقيـده
يمثـل ربوعـه ورجـال مـاثـوق
وان مـد مامـد الـردى والزهيـده
يقلط وياخـذ حـق ويقـدم حقـوق
ولايقـول الا الحـروف الفـريـده
ينوب في ماقف وواجـب بطـاروق
وقت النوايـب والامـور الشديـده
واليوم كلن يجـذب الدلـو ويحـوق
ونادر تجد ماشي على الدرب سيـده
ياقافه مقـول .. وياقـاف مسـروق
تقول ضـب ٍ كـارع ٍ فـي رديـده
يبدابهـا مدحـه ويسريبهـا شـوق
ويردهـا حكمـه وتطلـع عصيـده
نص القوافي والمواقيـف مطـروق
لفق ووفـق ليـن سـوى قصيـده
اهم شـي يكـون رجـه ومطفـوق
حتـى يقـال فـلان شاعـر وليـده
معاد تلقـى حـس صـادق ولاذوق
بثي يا اذاعـه وانشـري ياجريـده
مدرى البلا من تحت والا البلا فوق
الوضع مـزرى والرقابـه رشيـده
ولو تنصح الماخوذ قال انت لى عوق
لو انت من ربعـه وغـال البديـده
حنا بوقت الهون والضعف والبـوق
وراحو هل الاريا السمـان السديـده
كم شاعر مبدع ومتقـن ومفهـوق
يموت مـازول درى عـن نشيـده
خياله أليا لاح رعـاد وبـرووووق
وبنات فكـره مـن سمعهـا تفيـده
واليا بغا الهدات في حظـه سبـوق
ماله مـع الايـاام فرصـه سعيـده
مشقيتـه الايـام بالفقـر والنـوق
والدين وظـروف الحيـاه العنيـده
لو عزوته برقا ولـو عزوتـه روق
وجـده كبيـر القـوم والا عقيـده
مادام مالـه مـال فالحـظ ممحـوق
وان عاش والا مات ماهـو فقيـده
حنا بوقت المال والفلـس والسـوق
وقبيلـة الرجـال فيهـا رصـيـده
هذا الصحيح وكل مطـرود ملحـوق
بثي يا اذاعـه وانشـري ياجريـده